#المدينة_المنورة بعد ما تكملو العمرة ديالكم و أيامكم في مكة المكرمة تمشيو للمدينة المنورة ، تقدرو تروحو بالحافلة ولا كلونديستان الوقت بين 4-5 ساعات و الواحد باش ما يكدبش ما علاباليش السعر و الوقت بالضبط و لا تقدرو تروحو بقطار الحرمين ، أفضل وسيلة ، أنا رحت بالقطار حكمت كلونديستان من الحرم لمحطة القطار ب 20 ريال و تماك حكمت TGV المسافة بين مكة و المدينة ساعتين فقط خلصت الذهاب من مكة- المدينة 138 ريال و بين المدينة -مطار جدة 170 ريال ( كلش تقريبا واحد 70 أورو .. ) نقدرو تحجزو التذكرة من قبل و تجيكم رخيسة و كاينة حاجة كي تجو راح ترحبو في القطار تصيبو واحد الشخص يقوللكم بلي الكابة ديالكم كبيرة و لازم تبعثوها !! لالا هذوك عمال تماك و ماذابيهم تخلصو على الكابة !! الكابة طلعوها معاكم .. كي تلحقو للمدينة أحكمو كلونديستان يديكم للحرم النبوي ب 40 ريال ولأ كلونديستان جماعي ب 20 ريال للبلاصة .. الحاجة المليحة في المدينة الفنادق ماشي بعاد و الأرض مسطحة تسمى مافيهاش الطلعات كيما مكة ، لوتال شباب بزاف و 1دقيقة مشية على المسجد ، كريت تماك كي لحقت و خلصت 490 ريال ليليتن برك .. و كيما قلت الغرفة فيها 3-4 أماكن لوكان تروحو 3 تقسمو ها تجيكم أرخص .. في المدينة حجزت باش نصلي في الروضة في تطبيق نسك و صلت تماك على 3 تع صباح ، في المدينة تحس واحد الراحة ماشي نورمال زرتها في 2005 و هذي المرة ما تحسش بلي تبدلت كيما مكة … ناس المدينة كرماء و حتى المعاملة ديالهم و المعلمة تع الشرطة و عمال المسجد النبوي مختلفة .. كنت نجيبها صلاة و مور صلاة المغرب راني في حلقة تع الدين و مع صلاة العشاء نزور قبر الرسول(ص) نسلم عليه و نروح للفندق .. عندك الزيارات شفت واحد مصغر مصري ما شاء الله رحت معاه لمسجد قباء و مسجد ذي القبلتين و مسجد الخندق صليت في المساجد هذو و كنت رايح لجبل أحد بصح الوقت ما كفاش تسمى عاود رجعني للمدينة و صليت و مور صلاة العشاء عاود جاء و اداني لمحطة القطار ب 150 ريال .. حكمت TGV على 10 تع الليل و ال 12 كنت في مطار جدة مولي لبلادي … في مطار جدة يبيعو ماء زمزم تع 5 لتر مغلف و جاهز باش تبعثو في الطيارة ب 8.5 ريال بصح بفيزا عمرة فقط هذا privilege للمعتمرين برك ، فيزا سياحة ما عندكش الحق تشري ماء زمزم ( مغلف) في مطار جدة و ما يبعثولكش الماء في الطائرة تسمى لازم ادير حسابك و تشري ماء زمزم و تعمر قراعي صغار و تغلقهم مليح و تبعثهم باقاج بين حوايجك … الفندق في مكة و المدينة ب 1100 ريال و المواصلات بين مطار جدة و مكة و المدينة و تقريبا 600 ريال و زيدلها الأكل تسمى لوكان تروحو 3-4 أشخاص و تقسمو كلش ما بيناتكم السمانة هكداك ب 300أورو بين الفندق و المواصلات تماك و الأكل …و عندكم الطيارة من لبلاد و مصاريف الفيزا و ديرو حسابكم ، ما نقدرش ننصحكم اذا تروحو مع وكالة سياحية ولا وحدكم أفضل .. حكيت التجربة ديالي تع واحد موالف يسافر وحدو و شحال سقامتلي فقط .. إن شاء الله نكون قدرت ننفعكم و ادعولي معاكم و ربي يقدركم ❤️👏🏻
إلهام
ستبلغينها ❤
يعطيك الصحة و ربي يتقبل 😀
اللي راح عمرة بواش ينصحني نخلص مليون نص الاكل في الفندق مكة فقط ولا نشري وحدي
الله يرزقنا
ربي يتقبل ان شاء اللّه 🌹🙏🏻 و يكتبلنا زيارتها
ربي يتقبل
شوقتني لكل الاماكن اللي ذكرتهم 🥺🥺
بارك الله فيك أخي
حتى انا طالع وحدي على يومين ان شاء الله اعطيني اسم فندق مليح في المدينة لمدة يومين من فضلك
Et est ce que les agence de voyage ici en Algérie utilisent le train pour leurs mo3tamirin pour se déplacer entre medina et mekkah ou bien juste le bus ?
ماشاء الله عمرة مقبولة ان شاء الله
تقبل الله
بارك الله فيك. عمرة مقبولة ان شاء الله
ربي يتقبل
انا كنت اضن في مكة لا يوجد الكلاندستان كل يعمل بالتصريح و تحت القانون
اللهم بلغنا ياارب 💜
ربي يتقبل منك ان شاء الله
ربي يوصلنا ليها .جزاك الله خيرا
شكرا ربي يتقبل ان شاء الله راكم غير تسخفو فينا ههه ان شاء كيما اليوم نكون في هذيك بلاصة ربي يرزقنا
لأمانة فقط معلومة حاب نضيفها أنو أي واحد عندو فيزا امريكا يقدر تان يدخل بيها السعودية
اللي محتاج أجوبة على بعض الاسئلة يراسلني انا كنت ثم ننصحكم لوجه الله
ربي يتقبل ان شاء الله ، شوقتني 🥺❤
ونعم النصااائح
عمرة مقبولة ان شاء الله ، و ربي يرزقنا
مقبولة إن شاء الله
جزاك الله خيرا
شكراً على المعلومات
الحافلات ماشاء الله هايلين مريحين بصح الطريق طويلة بزاف تعب حوالي 7 ساعات و غير صحراء
Bïllël Æb
تطبيق نسك لرجال فقط او حتى النساء ؟ رحت في 2014 زعمة نصلي في الروضة عفسولي على راسي و رقبتي و انا ساجدة قريب قتلوني 👀
قطعت صلاة مباشرة
Fatima Zahra Selman
El Kan
نورتنا ربي نورك ويوريك والديك مع النبي صلى عليه وسلّم عند الحوض
انت تفصد بكلمة كلونديستان تاكسي عادي ؟ ولا بالتطبيقات كيما يسير ؟ او المعنى الحقيقي للكلمة نقل غير قانوني للافراد لانو استغربت كيفاش منتشرين بزاف و انت تلقاهم بسهولة