تعقيبا على منشور الاخ بذكره لعاصمة جمهورية التشيك براغ. اود ان اشارككم بعض المع

تعقيبا على منشور الاخ بذكره لعاصمة جمهورية التشيك براغ.
اود ان اشارككم بعض المعلومات حول هذه المدينة الساحرة.
المدينة تقدر تزورها بفيزا شانغن بحكم الدولة تابعة للاتحاد الاوروبي و تقدر حتى دير نهار تحكم القطار يوصلك لفيينا دور مليح و تروح لعشية، مدة السفر 4 ساعات بين العاصمتين.
العملة تاعهم الرسمية هي الكرونة التشيكية لي تقدر تقول 1 اورو = 23.80 كورونا. الاورو كعملة ايضا كاين لكن ليست مستعملة بكثرة و من الاحسن تغيير العملة عند مكتب الصرافة اللي باين مش كلهم شرعيين لانو فيهم بزاف محتالين. كاين واحد معروف في ميدان وينسيسلاس عربي عندو احسن سعر للصرف.
و تاني حاجة مننصحكمش تغيرو العملة في مطار او محطة الحافلات او القطار. الا عندكم تطبيق revolut تع البنك تقدرو تستعملو تقنية الدفع عبر قوقل باي ولا ابل باي.
اللغة تاعهم تشيكية و مش روسية ولا تشبه كيما يعتقد بعض الناس، صح تعتبر لغة سلافية لكنها مستقلة و اقرب لغة ليها هي السلوفاكية او اقل شوية البولونية. مع العلم ان اللغة صعبة نوعا ما.
الشعب من ناحية السياحة تلقاه مضياف و مرحب جدا خصوصا في العاصمة لي معظم الناس فيها تتكلم اللغة الانجليزية لكن في بعض الاحيان راح تتلاقى بسكان اصليين ميحبوش يتكلمو لغة اخرى الخ… لكن على العموم كي تسأل باحترام راح يجاوبوك.
المهم معمرة اماكن طبيعية و معالم تاريخية و معمارية خصوصا البنايات و الجسور و القلاع لي تخليك تحس نفسك في القرون الوسطى.
كاين ياسر ديزوبارج رخاس وين تقدر تبات و مطاعم الحلال كاين منهم الاندلس و يافا و الدمشقي الخ… و كاين تاني محلات لبيع الحلال منهم واحد جزائري المعروف باسم chez amis ليعتبر إمام المسجد في نفس حي المحل ربي يبارك فيه، ولا farah food ثاني يبيع الحلال.
وسائل النقل في العاصمة حاجة فخمة و في كل وقت حتى منتصف الليل مع تغيير في الوقت الفاصل بين وصول الترام و الترام الذي يليه مع العلم انو تذكرة النقل تقدر تستعملها في الحافلة،المترو و الترامواي لي تقدر تشراها من محطة المترو او السوبواي او داخل الترام واي كي تكون عندك كريدي كارت.
من ناحية الامن،المدينة جد آمنة و مكانش فاها الجريمة بزاف من غير ساعات ضاربي الكحول او الناس في حالة سكر لي يتعبو ساعات يعييو هههه و شوية جماعة بدون مأوى.

المهم المدينة مش كبيرة بزاف تقدر تعقب 3 يام دور و تحوس و تشوف اهم المعالم لي فاها و متسقاملكش اكثر من 400 اورو.

احسن وقت لزيارة العاصمة براغ هو الربيع بين اواخر ماي حتى بداية جوان. لا انصح بالزيارة في الشتاء لانو بارد ياسر الا ادا كانت اواخر ديسمبر مع عيد الميلاد تاعهم تكون الاجواء مليحة صينو مش راح تتمتع و الصيف تاني سخون.
في الاخير و اهم حاجة المساجد كاين 3. اكبرهم في cerny most بعيد شوية على وسط المدينة و الثاني في مكان قريب ل محطة palmovka و اقرب واحد تقدر تقول في شارع narodni treda كيما قلت الفوق لي حاكمو جزائري عمي أحمد صاحب محل chez amis لبيع المواد الغدائية العربية و الجزائرية.

المهم كاين ياسر معلومات، ان شاء الله كاين ناس تستفاذ من هءا الموضوع.

اسمحولي طولت عليكم شوية، نخليكم مع بعض الصور الرائعة.