دبي 2023 Dubai uae سلام عليكم . حبيت نحكيلكم على رحلة دبي رأس السنة ٢٠٢٣ رحت ان

دبي 2023
Dubai uae
سلام عليكم . حبيت نحكيلكم على رحلة دبي رأس السنة ٢٠٢٣
رحت انا و اخي .. بالنسبة للتذكرة شريناها قبل ثلاث اشهر يعني كانت 78000 دج
المهم الرحلة تاعنا كانت يوم ٣٠ ديسمبر علحداش تاع ليل مع الخطوط الجوية الجزائرية… و وصلنا ل دبي على 9 تاع صباح . من المطار كاين ميترو و ماشي غالي تروح بيه ل أي منطقة في دبي
حنا الفندق تاعنا كان اسمو حافظ للشقق الفندقية . هو فندق ثلاث نجوم …. يعني فالحقيقة مافيه والو المهم مكان نظيف نرقدو فيه . قريب بزاف من محطة الميترو “الراس” . المنطقة هاذيك هادئة يعني ترقد آلاز .. قريب بزاف من سوق الذهب . و مقابلة سوق دبي القديم .. يعني صح انو تحت الفندق مكاين والو من غير حوانت تاع بيع المكسرات بالجملة خخخ لكن كي تحب تحوس كلش قريب بالحافلة او الميترو
المهم وصلنا للفندق ريحنا شوية. و على الثلاثة خرجنا باتجاه برج خليفة لحضور حفل رأس السنة … المهم رحنا للمحطة شرينا كارت نول ب 25 aed .. تلقا فيها 19 aed . و شارجيناها ب 110 aed صالحة ل مدة سبع ايام … تديبلاصي بيها وين حبيت في دبي: ميترو و حافلات و ترام واي …
المهم من ثما قلعنا . كي وصلنا لقينا محطة دبي مول و برج خليفة مغلوقة . هبطنا فالمحطة اللي بعدها اسمها “الخليج التجاري” من ثما هبطنا و قعدنا نمشو .. يعني كان غاشي كبييير معانا . حتى وصلنا ل مكان قالولنا العائلات يكملو من جهة و الشباب من جهة اخرى. كملنا طريق . وصلنا ل نقطة تفتيش و كملنا حتى دخلنا ل البارك تاع برج خليفة … كانت الربعة هكاك ولا . قعدنا مع العائلات …. من كل أنحاء العالم .
يعني ماشاء الله وحد النظام. و وحد الأمان قليييل وين تشوفو … يعني كل واحد من بلاد و كل واحد و ديانتو. كامل قاعدين في مكان واحد . كاين أماكن منين تشري الماكلة … و لاااازم،تدي معاك snacks.. يعني فاكهة ولا قاطو. و طبعا الماااء. يعني كاين مكان وين تعمر الماء و لكن الواحد يدير احتياطاتو افضل … تلقا جماعة يشطحو و جماعة يتصورو و جماعة ياكلو و يقسمو الاكل مع،جماعة مايعرفوهمش اصلا … تحب تروح تدور ولا تروح للمرحاض حاشاكم.. تقول ل اي واحد يعسلك ساكودو ولا … يعني تقدر مام تروح و تخليه مكاش لي يخلط ولا يتوشيه … تشوف انسانية الله يبارك . اللي طاحتلو الباتري يطلب من اي واحد يعطيلو power bank . مثلا انا كانو قدامي عايلة من المغرب الشقيق. عطاولي تيليفون هدرت مع،الوالدة،طمنتها علينا .. لانو ماكانش ويفي فالبارك .. يعني كاين ف،جهات و جهات لالا .. .و كنت ماشريتش puce . المهم يعطيه الصحة … المهم كيما قتلكم كلش منظم . ماتحتاج وااالو . و ماتحسش بالوقت لأنو كاين فعاليات dj و غناء طول الوقت .. و كل نصف ساعة يديرو النافورة الراقصة.. المهم لحقت 00.00 بداو الألعاب النارية و الاحتفال بالسنة الجديدة .. و تحقق حلمي 😅😅🥰 موراها،بداو الغاشي يروحو،. قعد الديجي للي حب يسهر شوية . من ثما رحنا ل دبي مول .. كانو كل المطاعم مفتوحة . تعشينا ثما عل وحدة تاع ليل خخخخ .. من ثما كاين جماعة اللي يروحو ب طاكسي للفنادق و يكون الثمن،غااالي بزاف . و كاين اللي يستناو للخمسه تاع صباح يبدأ الميترو
المهم حنا الحمد لله نعرفو واحد من دبي جا لحقنا للفندق كانت الثلاثة،تاع صباح هكاك رقدنا ديراكت حتى للثناش من اليوم التالي خخخخخ
المهم حبيت نعطيلكم معلومات او نصائح للي يزورو دبي لأول مرة :
🔴بالنسبة للمواصلات تقدرو ماتستعملوش التاكسي اصلا … و اذا تحتمتو لازم تكون التاكسي الحمراء من فوق و عليها اشارة rta
🔴كي تحبو تروحو ل أي مكان استعملو تطبيق maps .. يعطيلكم كامل الطرق الممكنة للوصول. حتى بأرقام الحافلات و لون خط الميترو الاخضر او الأحمر..
🔴 كارفور carrefour كاين في كل المناطق . تلقاو فيه منتجات بأقل الأسعار خاصة كارفور اللي في مول الإمارات. فيه بزاف les promotions
انا اشتريت الشكلاطة و الحلويات للعائلة من ثما . حتى الفاكهة و خطرات تلقاو اطباق جاهزة تجي ارخص بكثيير من المطاعم
🔴في دبي مارينا . بالنسبة لركوب اليخت .. كاين بزااف انواع . سقسي مليح قبل ماتخير . و قارن الاسعار و الخدمات و شكل اليخت او … اما بالنسبة للناس اللي مايحبوش يصرفو بزاف و مايهمهمش العشاء الفاخر وووو المهم انهم يركبو يخت خخخ كاين محطة rta . تركبو ب 5 aed يلحقك من دبي مارينا إلى blue waters island يعني قدام عين دبي أو العجلة الكبيرة. كي تلحق كاين الفوق متاجر و مطاعم و كاين جسر اذا حبيت ترجع تمشي .. و اذا حبيت ترجع باليخت . تخلص 5 aed و يرجعك ل مارينا
🔴 بالنسبة ل اتلانتيس او جزيرة النخلة او نخلة جميرة… كاين محطة مونوراي monorail . تقدر تخلص ذهاب فقط او ذهاب و إياب. او day pass . و انا افضل الاخير لأنو تيكي ب 35 aed يشدلك نهار كامل و تهبط و تعاود تطلع من اي محطة . المهم حنا شريناه،و ركبنا فالمقطورة،الامامية تقدر تصور فيديو اكثر من رائع يكون مقابلك فندق اتلانتيس . المهم توصل ل اتنلانتيس فيه بلايص بزاف شابين و مطاعم و كافيتيريا. اكواريوم و بزااف فعاليات تقدر تديرها و تقدر تدور برك و تتصور كيما حنا خخخ . تخرج برا كاين كورنيش تمشي فيه،شوية،و تعاود تولي تركب ف المونورايل . تهبط فالمحطة اللي بعدها the pointe .. بلاصة بزااف شابة للتصاور مع أتلانتس . فيها شاطئ صغير . فيها حوانت و مطاعم و نافورة راقصة يعني جوزنا فيها وقت شباب حتى للمغرب . عاودنا ركبنا و هبطنا ف محطة النخيل مول .. هو مول جدييد مزال مافتحوهش كامل . مي كبييير و شباب بزاف . من ثما عاودنا رجعنا للمحطة الاولى
🔴 بالنسبة للقرية العالمية ننصحكم بزيارتها .. تتعلمو بزاف،ثقافات الشعوب من،كل العالم . من أكل و ملابس ووو لكن باالاكو تصرفو بزاف خخخخ راني نقول هكا باسك انا صرفت اكثر مما توقعت . مي شريت عفايس شابين
اول حاجة هي تفتح ع ثلاثة تاع عشية
ثانيا هي نروحو ليه،بالحافلة 10 aed ذهاب و، 10اياب. .. ماهيش داخلة ف 7days pass . يعني لازم،تزيد تخلصهم .. حنا رحنا من محطة الغبيبة. كاين محطات اخرى . على حساب المنطقة اللي تكونو فيها … المهم عند الوصول التيكي ب عشرين درهم .
بالنسبة للماكلة كاين لقيمات اماراتية . بنان بزااااف ننصحكم تجربوهم … عند الأتراك ماتجربوش البراك بالجبنة.. لأنو مافيهش كامل الجبنة خخخخ يعني راحت،25 aed في باطل تقول راك تاكل فالمسمن خخخخخ … عند اهل الشام يعني فلسطين و سوريا،و،لبنان رايحين تشبعو زعتر و جبنة خخخ المهم،كل دقيقة،يعطوني نذوق عجبوني بزاف حتى شريت خخخخخ اه و نصيحة اشرو غير واش حابين ماتخلوهمش يخدعوكم باش تشرو بالجملة هههه تكون راح نشري بلارة تاع،جبنة ب ،35 يقولك اشري اربعة ب 100 . اذا عجبوك في اربعة صحا … سينون غير مكالاه خخخ،يعني عندهم اسلوب اقناع غير عادي خخخخ
بالنسبة للأسعار قدما تنقصلهم قليل خخخ،لأنهم يمدو اسعار عااالية
🔴 حااااجة جد مهمة و هي العطور
ملي تلحقو ل دبي تلقاو بزاف اللي يبيعو العطور ب طريقة احترافية خخخ تلقاهم ف دخلة تاع دبي مول او في القرية العالمية او في كل مكان. يقولك أرواح شم ريحة برك. يمدلك ريحة بزاف شابة باش تعجبك .. و يقولك كانت،400 و راهي ب 200 فقط . كي يشوفك ماشي حاب تشري يقولك و نزيدلك وحدة هدية. اذا قبلت صحا . سينون يقعد يزيدلك حتى يلحقو اربعة عطور هدايا و الخامسة زعما تخلصها ب 200 او 100 .. يعني يعمرلك الصاشي و،يحشمك… فالاخير تلقاهم ماعندهم حتى معنى كي شغل ماء معطر. و ريحتهم ماشي شابة .. اللي عينو ف ريحة كاين محلات في سوق نايف . تخير ب عقلك و تشري بالوحدة و بزاف شابين و رخاس . و كاين ثاني فالمول فالمحلات الآسيوية miniso or mumuso ..تشري حتى ب 20 درهم و ريحة بزاف شابة
🔴 كاين ثاني بعض المصريين تلقاهم يحبسوك و يقولولك مبروك عليك ربحت هدية معانا … تاخذو رايي خاوتي. .. مالكلمة الاولى قولولهم غدوة طيارة لي نرجع،فيها،… هكا مايضيعولكمش وقتكم ب قوالب تاعهم
🔴 بالنسبة للعبايات اشرو من سوق نايف .. خيرو بعقلكم و نقسو السعر الماكسيموم . خيرمن بلايص اخرين بالنسبة للسعر و الكاليتي
🔴 التسوق مليح ف سوق نايف. محلات day to day . و الكثير من محلات الهدايا .. اعرف برك واش تشري لأنو الكاليتي ناقصة .
🔴التسوق في المولات … الواحد يتبع الصولد ممكن تلقا قطع من الماركات ب سعر بزاااف شباب .. محلات brand for less كاين في كل المولات .. بصح لازم تخيرو مليح،و تشوفو اذا فيها لي ديفو.. يعني قادرين تشرو بزااف عفايس شابين من أكبر الماركات ب سعر بسيط .. و قيسو عندهم باش تقدر تبدل بالخف لأنو السفر ايامو محدودة ماتقدروش كل يوم ترجعو تبدلو
🔴 المولات في دبي كل واحد و حلاوتو … ننصحكم تشوفوهم كامل
Dubai festival city تروحو ليه ب ميترو و تكملو بالعبرة.. بزاف شباب و كبير … و على،الثمانية تاع الليل يديرو العاب ناريه رووووعة
Dubai mall كبير بزاااف و قدامو النافورة الي تبدأ من بعد المغرب للثناش تاع ليل و خطرات يديرو العاب ضوئية على برج خليفة رووعة،.. كاين ثاني قدامو mexican wings تتصورو مع برج،خليفة تصاور بزاف شابين
Mall of the emirates.. بزاف lux .. صراحة عجبني فيه،كارفور بزاف كبير و فيه les remises
Marina mall بزاف شباب و فالمطعم كاين اطلالة على مارينا روووعة
Shandagha city center قريب .. ماهوش كبير مي فيه محلات ماهمش غاليين كيما max w brand for less w daiso …
🔴 شاطئ JBR بزاف شباب .. كاين وين تلبس و تدوش . مي تخلص … مانعرف شحال باسك حنا النهار لي رحنا فيه كان البرد ماعمناش … فيه مطاعم ملاح و ممشى شباب ..و فيه العاب. نارية ع ثمانية تاع ليل تقدر تشوفهم م شاطئ ولا من الجسر تاع blue waters island
🔴 الماء اشرو من كارفور فاردو تاع ستة . يستقام اقل . . استمتعوا بالفواكه الاستوائية اللي حنا عندنا غالية
🔴 بالنسبة للهواتف النقالة. .. سقسي منا قبل ماتروح .. اذا يبعثوك ل واحد ثقة ووو سينون غير مكلاه،تكسر راسك لأنو كاين بزاف هواتف مغشوشة و الأسعار يزيدو و ينقصو كيما يحبو … يعني ماتضيعش وقتك معاهم اذا كنت ماتعرفش
🔴 كي تكون راجع راح تلقا فالمطار اللي يحبو يهبطو تليفونات… ماتخاطرش ب روحك علاجال تيليفونات
🔴 تقدر ماتشريش puce اصلا . لأنو،الويفي متوفر في كل المولات و الفنادق … . و ننصحك تدي تيليفون يصور مليح، أو كاميرا
🔴 بالنسبة ل،شراء الدرهم … ننصحك تصرف غير ب شوية لانو خطرات يطلع و تندم خخخ . كاين بنك gcc جاي ف سوق نايف . ديما نلقا عندو افضل سعر سينون كاين البنوك في كل مكان و فالمولات
✅️علابالي المنشور طويل بزاف،بصح سييت نحكي عن تجربتي . باش ماتغلطوش و ممكن نعاونكم باش ماتصرفوش بزاف .. حنا نحبو التقشف حتى و لو دبي غالية