ربما الكثير يرى دبي شيء خرافي، ساحر، جنون، نظرا للصورة الإعلامية التي يتم تصويرها عليها، اضافة إلى جيش الفتيات عبر الانستغرام اللواتي يروجن لها أنها جنة فوق الأرض، من يعيش فيها قد يجيبكم أفضل مني، ونظرا لأنه قروب سياحي سأضع مقارنات بسيطة فقط، تؤكد أن السياحة في دبي “يزيدو عليها بزاف”.
مثلا برج خليفة، باه تطلع للقمة وتضرب طلة ونتا واقف على ناطحات السحاب والبنيان والطرق بـ389 درهم = 100 أورو (2 ملايين وحوايج) للشخص.
في الجهة الأخرى، اسطنبول مثلا عندهم برج السفير، فيه مول من تحت، وتطلع للقمة أيضا بسعر 75 ليرة + عرض سينما 4 دي وهو ما يساوي تقريبا (5 أورو يعني 100 ألف)، وكي تطلع تطل على الجانب الأوروبي تاع اسطنبول بكل والقرن الذهبي وجزء من البوسفور ومنطقة ليفنت شيلشي بيشكتاس ووو، شغل فرق كبير جدا، وزيد كاين كراسي وطوابل تريح مجانا مايش لازم تشرب شيء معين، وتحب تقعد نهار كامل واحد مايحكي معاك، تزيد تروح للسينما 4 دي عرض مجاني للتعرف على أهم معالم اسطنبول بالهيلوكوبتر الافتراضية!
نزيدو مقارنة أخرى، في دبي باه تركب عبارة مائية، تنتقل من بلاصة إلى أخرى أقل شيء 50 درهم (13 أورو) تقريبا، وإذا تدير جولة في دبي مارينا مثلا في الخور تاعهم ولا البحر فوق 100 درهم (25 أورو)
في المقابل في اسطنبول العبارات المائية تاع الدولة وهي وسيلة تنقل، دخلوها في رفاهية الشعب من جهة في السياحة بعد، تخيل تقدر تروح في عبارة البلدية المائية ساعتين في البحر وتفوت على 4 جزر في الطريق وتوصل لجزيرة أدلار الكبرى “جزيرة الأميرات” بسعر 25 ليرة ! الى يساوي 30 الف بصواردنا تقريبا!
تحب تحوس في البوسفور؟ تركب من محطة كاباتش مثلا إلى محطة أميرجان واحد 50 دقيقة في الطريق، وتشوف أغلب المعالم تاع البسفور في الطريق وطائر النورس فوقك بـ20 إلى 25 ليرة !
صراحة السياحة في دبي تطرح ألف علامة استفهام، ونحير في الناس الى يدهشو فيها بزاف، أسعار خيالية مقابل عروض وأمور ترفيهية تلقاها في أماكن أخرى بسعر أقل أضعاف كثيرة
أمر آخر، وهو اقتناء الحاجات، في دبي غير أنسى تشري القش بسعر مناسب ونوعية مقبولة ههه مكانش، حتى الأمور التذكارية غالية جدا، شغل دبي سبيسيال للطبقة الجيدة وفقط، تاع الخليج والهانيين تاع أوروبا وضواحيها، رغم أنه مكانش حاجة سياحية تدهش مقارنة بأماكن أخرى.
حسب تجربتي، اسطنبول هاربة سياحيا من حيث التنوع والخيارات والأماكن وخاصة الأسعار بزاااف على دبي، وهذا رأي خاص وفقط.
#1001_سياحة
ودي شدانا لدبي وتركيا احكيلنا على بلادنا الجزاير شابة الف مرة ومرة على كل بلد في العالم غي حنا حاقرينها مناش عاطينها ديك قيمة مثلا غي صحراء تاعنا تكفي وتوفي ماشاء الله ربي يحفظ بلادنا احكيلنا على بلادنا وين نروحو وينهم بلايص لي رخيصة في الناحية المادية خويا😊
لا وجه للمقارنة بين دبي وإسطنبول ، فالاولى عبارة عن حضارة أسمنتية والثانية تروي لك المجد العثماني والتوسع الاسلامي ، زرت المدينتين ولكن أفضل اسطنبول
و زيد تركيا فيها بزاف معالم تاريخية تحس فيها حياة و حضارة لا مجال للمقارنة 😍
دولة تاسست منذ أقل من 40 او 30 سنة مقارنة بدولة تمتد اصولها لمئات السنين،. لا مجال للمقارنة.
دبي لا يوجد بها اي معلم تاريخي يمكن زيارته ،
دبي تستقطب اغنياء العالم ..لسطنبول تستقطب الناس العادية لهذا الاسعار تختلف …
أكيد اسطنبول اجمل حضارة و تنوع و أثار و تاريخ ، اما دبي مدينة حديثة و تكنولوجيا و يبقى كل واحد واش يحب
كي قلتلهم دبي فيها سياحة تاع زوخ برك ، قالولي ماتعرفيش ودبي ودبي ودبي ونتي ماتفهميش … بنفس السعر لي تروح بيه لدبي راح تجوز عطلة فالشباب في بلد آخر
اسطنبول لها تاريخ و عراقة الدولة العثمانية لأنهم حافظوا عليها و استثمروا فيها و جعلوا منها بوابتهم للسياحة أما دبي من وجهة رأيي فهي مجرد ناطحات سحاب و des malls و بعض الحدائق يعني الأولى التزمت بتاريخها و تقاليدها و أصالتها أما الثانية فهي وليدة التكنولوجيا و الحداثة.
يعني الصراحة المقارنة دبي اسطنبول غير قابلة للمقارنة لأنه اسطنبول غيييرررر فيها حضارة و تاريخ و عراقة و و و و و بلا ما ننسى هواء البوسفور ..
مشكلتكم الكبيرة هي المقارنات في الأذواق و في الثقافات، من حيث الجانب المادي، هذه مقارنة مغلوطة، لأن كل بلد يعرف قيمة أشيائه و يعرف لما يضع الأسعار و خاصة في السياحة، حصلنا مع السياح لي يقارنو في المصاريف و يحوس يصيف في دبي كيما يصيف في بلادو…
راكم غالطين فيها هذي مع احترامي ليكم، البلاد كيما جيتها خليها و ما تشوهاش
فرق كبير بين السياحة فيهم تركيا عندها تاريخ وعراقة معالم محافضين عليها اما دبي مجرد ناطحات سحاب وشوية طرق ماكان لا تاريخ لا والو بيطون وخلاص وعلاه نخسر صوارد.باه نشوفها
في كل الحالات خدمو و طورو. بغض النظر على السعر داروهم بأه يدخلو الدراهم مش باش بفوتو الوقت.ماذا عنا نحن حنا خير منهم عندنا اربع فصول بحر تل صحرا تتلفلك وين تروح بصح لو…… 😑😑
عمري لانتمنى نروح ليها نحسها اصطناعية😅
يبقى هذا رايك الشخصي. لكن لا مجال للمقارنة واش جاب جاب وهل تقارن برج خليفة ببرج السفير أو اكبرنافورات راقصة واكواريوم دبي أو شواطئ جميرة اوسحر مرينة أو جمال شوارعها ومساحاتها الخضراء الكبيرة وتنوع حدائقها العالمية .زد على ذلك نظافة تامة و مدينة آمنة هناك فقط مشكل الاسعار الباهظة. لكن برج خلفية يستحق المغامرة فأنت تحس بضغط رهيب في المصعد من شدة ارتفاع المكان.صح مدينة اسطنبول لها سحر جداب في منطقة البوسفور اوشارع الحرية وكذلك بنايتها العثمانية وقصورها ومساجدها العريقة. لكن تبقى مدينة ينقصها الكثير من الجانب السياحي. خاصة خشونة الأتراك. أما النظافة فدبي انظف من اسطنبول بالف سنة ضوئية .تركيا الحقيقية خارج اصاور اسطنبول مثل طبيعية وجمال الغابة السوداء وغابات بلغراد في الشمال ومغامرة البحر الاسود سحر ازمير وانطاليا بحر ايجي ومرمرة ثلوج بورسة . تركيا ليست فقط اسطنبول .
أخي انت تقارن بين نوعين مختلفين من السياحة
تركيا عامة او اسطنبول خاصة يهتم بالسياحة التاريخية ممزوجة بقليل من الانفتاح الثقافي
دبي تهتم بالسياحة المعمارية الحديثة و التكنولوجيا و الحياة المعرفة
اذا تكلمت عن الاسعار فيمكنك إن تذهب في إجازة الى دبي و تسأل المقيمين فالبلد عن كيفية التنقل و الاماكن السياحية التي لا تتوجب دفع مبالغ كبيرة
سمحلي أخي لكن الفتيات أو الأشخاص اللي تروج لدبي ماقالوش أن الأسعار منخفضة أو غالية. و زيد 100 أورو في بلادك تعمل 2 ملاين، في أوروبا يوم عمل فقط. ماتغلطش. المشكل في الدينار الجزائري ماشي في دبي.
مقارنة شيئين ماعندهمش نفس الخصائص
تركيا بلد يعتمد على السياحة و دبي بلد يعتمد على الاستثمارات
بالزيادة على ذلك، الامر مثل المحلات التجارية كل محل و عنده الزبائن تاوعه ، دبي تستهدف نوع من السياح و تركيا تستهدف نوع مختلف تماما!
مثلا غي عندنا هنا كاين ناس تشجع على التخييم و hiking و البعض يساعدهم انهم يكرو مثلا!
مقارنة في غير محلها كل بلد و باش يتميز يلا انت ما تبغيش الفخامة كاين الي يبغيها و العكس و الاسعار الي ذكرتها راك مبالغ فيها من الاحسن كون هدرت على سلبيات و ايجابيات كل بلاد و حدها بلا مقارنة لانها غير منطقية
مفهوم السياحة هو التعرف على اهم المعالم التاريخية لذلك البلد دون إهمال التطور الذي وصلت إليه مع الحفاظ على هويتها الأساسية
وأيضا السياحة في المقام الأول تعتمد على تنمية السياحة الداخلية التي تكون مقرونة بالقدرة الشرائية للمواطن وبهذا التوجه للسياحة الخارجية تأتي بالتبعية
وهذا ما نعاني منه نحن الجزائريين، السياحة الداخلية منعدمة ونبحث عن السياحة الخارجية
السياحة ليست انك تقارن هذا بهذا أستمتع بزيارتي لدبي كما استمتع بزيارتي لاسطنبول كل وحدة عندها الخصائص نتاعها… اذا ذهبت المقارنة لن تستمتع واذا بقيت تحسب قداه تسقاملي هاذي وهاذي وتحول للدينار راح تريح قرعة ماء صغيرة ما تشريهاش …
الخلاصة أستمتع وفقط …
تسما راك تقارن في برج السفير ببرج خليفة !
وتقارن في عبارة في البوسفور باليخوت في مارينا دبي !!!!!!
زيد قارن هذي : تطلع لسانتا كروز في وهران باطل وتطلع لبرج السفير في تركيا تدفع !!!
كأني بك تقارن بين السفر ب Cleo والسفر ب mercedes.
كلاهما سيارة ✌️
دبي مبنية بطرق حديثة
مدن تركيا يغلب عليها طابع الحضارة السابقة
هناك فرق …
يتسما هنا كل واحد وين يحب يرمي روحو
والترويج لي راك تحكي عليه ماجاش من العدم .هدو عرب كيفهم كيفك مي خدمو على رواحهم ودراهمهم ماراحوش هباء منثور
كل وحدة و مناظرها اسطنبول مدينة بحرية بزاف و من تروح ونتا راكب في الباخرة عندهم وسيلة مستعملة بكثرة مي دبي مدينة صحراوية صافي الشي لي دايرينو شغل خالقينو بالسيف موش جاي وحدو هك
بالنسبة ليا لا اعتبر دبى مدينة سياحية هي مدينة مال و اعمال
انا رحتلهم في زوج ، دبي تقعد فيها سمانة يحكمك الملل ، اسطنبول مستحيل تخلصها في سمانة ،و كل يوم حاجة جديدة و مختلفة و زيد مانهدروش على السومة
شافوك سياحة
ضربوك للراس
برج خليفة تطلع للطابق 140 + تذكرة دخول اكواريوم دبي مول 100درهم فقط
مافهمتش كيفاش حسبوهالك 100€
انا معاك ان الاسعار غالية (مقارنة بشخص يحسب بالدينار ) لكن ان تقارن برج خليفة (و الدارن تاون بشكل عام ) مع اسطنبول فهذا حسب رأي مغالطة سياحية
الميزة رقم واحد في الامارات بصفة عامة هي الامن التام يعني مكاش لي راح يدنى ليك
زد على ذلك على قد دراهمك تزهى يعني مفروغ منه انهم تعبو و صرفو على بلادهم من صحراء الى احدث المدن السياحية
مراحش يديرلك كلش باطل
المجال للمقارنة بين بلد له تاريخ وحضارة ورقي مع بلد اصطناعي نحسها كالوهم والسراب
ليه كل واحد يروح بلد تعجبو يجيبها في مقارنة مع دبي بالذات؟ 🤔😅
دبي ماشي تاع سياحة، نروحو باش نشوفو غير ناطحات السحاب ! بالنسبة لي السياحة، نشوفو مناظر طبيعية جديدة ، نشوفو معالم تاريخية، حاجات تقليدية…
من حيث التنوع الجزائر هاربة بصح كلاوها …
بالمختصر المفيد دبي عندك ماني تتشوف لي عمرك ماشفته ماعندكش او مزاينيك محدودة روح لتركيا احسنلك خيرماتجي لدبي وماتعرف تروح حتى لمكان لغلاء المعيشة اما اذا كان عندك دراهم دبي حسن مليون مرة
بالعكس أنا اري دبي هاربة بمفهوم السياحة،متحتاجش واحد مايصرفش عندها (زوالي)عندك ارواح نستفيدو من دراهمك معندكش ريح عاقل.
اشاطرك الرأي انا ايضا اعجبتني اسطنبول مقارنة بدبي من جميع النواحي
دبي ذات اسعار غالية لانه بلد مبتكر و اصطناعي ، سما كلش تخدم بدراهم لازم يعوض الخسائر و يدخل اضعافها أما بالنسبة لتركيا فاكثر معالمها طبيعية لذلك التكلفة الي حد ما جيدة أما بالنسبة لبعض المرافق سعرها مرتفع
انا عندي مفهوم تع سياحة فالطبيعة و الاماكن و المعالم التاريخية ، الحاجة الصناعية ما عندي فيها مالا تبانلي اسطنبول خير من دبي
دبي عبارة على ناطحات سحاب فقط لا تاريخ لا حضارة والو تقدر تروح نيويورك ثاني وبأقل تكلفة مخلوعين برك بيها مناه روجولها بزاف هاذا مكان نتحدى أي شخص يعطينا معلم تاريخي أو حضاري مكان والو هوما برك عرفو يستغلو الثروات تاعهم وبناو بلادهم من جديد كانو في الخيام ورجعو يسكنو في ناطحات
نسيت حاجة مهمة جدا تشكل فارق جوهري بين البلدين هي العراقة والارث التاريخي اللي يمتد لقرون في تركيا ويشكل عنصر جلب مهم للسياح في حين دبي تعد سياحة ترفيهية فقط ما عندهم حتى تاريخ.
و نسيت بلس دبي كل شيء راهو مبنى جديد يعني ماكان معالم تاريخية مثل تركيا لانو في بداية التسعينات واين اكتاشفو البترول و بداو يكونو عندهم الدراهم و يبنو من قبل كانو غير قباىل عايشة في الخيم
تحكي على دبي اللي شعبها مشهور بالثراء الفاحش … يعني لا تستغرب الاسعار !!! مقارنة غير موفقة
عن نفسي نفضل تركيا الحضارة تحكي والثقافة والتاريخ
امارة دبي اجدها مصطنعة ليست طبيعية ، اما تركيا تاخدك بين الماضي و الحاضر و كل شئ فيها طبيعي و جميل
المقارنة ليست في محلها اخي دبي قبل سنين كانت صحراء اما تركيا فمنذ القدم عندها جمال طبيعي وتاريخ يعني الأتراك ما زادو والو فقط وفرو الظروف والمستلزمات السياحية من نقل وفنادق ومستشفيات ووووو اما الإمارات فقد قامو ببناء دولة جديدة من الصفر كون البلد في الماضي كان عبارة عن صحراء قاحلة ولنزيدك معلومة اخرى انو كونك تبدء من الصفر وتشيد عجائب ومدن ومرافق بمختلف نمادجها سواء الشتوية مثل المزالج الثلجية وملاعب وطرقات خاصة بتنظيم سباقات مختلف المسابقات للسيارات وغيرها فأنت هنا حاربت ضد الزمن والظروف وتخطيت الحدود فليس بالأمر السهل ان تأتي في الأخير وتهدم مشروع بني وخطط قبل خمسين سنة بأنه مبالغ فيه يعني ادا انت تشوف فيه مبالغ فيه وكوننا نحن العرب والفتيات الأخريات هن من يروجن له فانت مخطئ فلم تأخد بعين الإعتبار رؤية الغرب لدبي وكم تصنيفها في العالم السياحي ولم تراعي متوسط الدخل الفردي خاصة في الشرق الأوسط كون دبي تستهدف الفئة الغربية أكثر منها من الفئة العربية اما تركيا فتستهدف الفئة العربية اكثر منها من الغربية كون العرب هم من سلطو الضوء اكثر عنها وابحث ايضا لأن الموضوع فيه تفاصيل كبيرة وكثيرة لا يكفيه مجرد تعليك او حتى منشور لعلمك
إن شاء الله يرزقنا ربي وروحو لإسطنبول
علاش تهدر على دبي ونسيت بلادك لي تبات في اوتال فايح 7000دج قريب 50 اورو بلا ما نهدرو على لي يقولو عليهم اوتال فخم يلحقو حتي 40000 دج لليلة في بلاد ما فيهاش السياحة لو كانت هناك سياحة كيفاش يكون السعر