سلام عليكم حبيت نحكي على رحلتي الى #الاردن في ماي 2023 تذكرة الطائرة من الخطو

سلام عليكم

حبيت نحكي على رحلتي الى #الاردن في ماي 2023
🔴 تذكرة الطائرة من الخطوط الجوية الجزائرية . شريتها من الموقع ب 49600 دج
🔴الفيزا مجانية .. من السفارة الاردنية في الجزائر لازم برك تدي معاك : جواز السفر. فوطوكوبي تاع جواز السفر. تذكرة الطائرة . حجز الفندق . صورة شمسية . كاين استمارة تعمرها ثما . سينون تقدر تخرجها من الموقع تاعهم و تعمرها من قبل ( خاصة إذا ماشي انت اللي تروح للسفارة)
🔴حجز الفنادق (هاذي الغلطة اللي درتها شخصيا) احجز فقط الليلة الاولى لأنو الطيارة توصل ف ليل و ماهوش وقت اللي تحوس على فندق على ثناش تاع الليل
غدوة من ذاك روح دور و و شوف ب عينك … لأنو الفنادق في وسط البلد قدم و الصور يخدعوك .. معناها شوف ب عينك الموقع إذا مليح .. النظافة و كل شيء . و حتى السعر ماشي كيما فالمواقع ينقصولك خاصة انو كلهم عرب و تقدر تناقش معهم الأسعار و تجيك ارخص بزاف من الموقع
🔴المواصلات : مكاش ميترو او ترامواي .. حتى الحافلات صعيبة باش تفهم طريقها … يعني راح تستعمل التاكسي ب كثرة للتنقل في وسط المدينة كاين طريقتين:
إما تركب التاكسي الأصفر و تقولو يشغل العداد و تتأكد أنو شغلو العداد يبدأ من 0.3 دينار أردني
و الطريقة الثانية هي استعمال تطبيق UBER راح ينقص عليك المناقشة مع السائق .. و تكون تقريبا نفس السعر مع التاكسي بالعداد

🔴 العملة تاعهم غالية … 1 دينار أردني = 290 دينار جزائري
100 euro = 76 dinar jordanien
في المطار يصرفو 100€ ب 59 دينار ( صرفو 50 € ماكسيموم و اذا قدرتو اقل . غير على جال التنقل من المطار إلى الفندق … لأنو المطار يبعد قريب ثلاثين كيلومتر على وسط البلد
🔴 للتنقل من المطار إلى الفندق كاين طريقتين :
-بالحافلة express : كاين ف النهار كل نص ساعة … و فالليل كل ساعة . تديك من المطار الى مجمع الشمال ب 3.30 JD للشخص الواحد .. كاين بزاف مواقف … انت شوف أقرب موقف للفندق تاعك و اهبط و كمل ب تاكسي باالعداد ولا دير أوبر (اذا الفندق كان في وسط البلد أقرب موقف ليك هو الدوار الرابع) يعني شوف في الموقع تاعهم على المواقف و شوف في الخريطة اللي هو أقرب ليك
– بالتاكسي يديك ل وسط البلد ب 22.5 JD اذا كنتو عايلة ولا عندك بزاف فاليزات و ماشي حاب تكسر راسك 😅
🔴 للتنقل بين المحافظات يعني للبتراء . وادي رم . العقبة . البحر الميت .. استعملو حافلات جت jet .. اذا كنت كاري في وسط البلد . تروح ب تاكسي ب 1.5 jd ل موقف حافلات جت في العبدلي و تركب فالحافلة…. بصح لازم تكون حاجز من قبل .. كاين رقم الهاتف ف الموقع . احجز يوم من قبل على الاقل
🔴اذا حبيت تنقص عليك شوية . للتنقل ل جرش (المدينة الاثرية) كاين حافلات تلقاهم في المجمع الشمالي تروح ب دينار تقريبا بصح لازم تبكر صباح لأنو مكاش بزاف ناس يروحو ل جرش بالحافلة .
🔴 بالنسبة إلى مقام اهل الكهف . تقدر تروح ب تاكسي بالعداد من وسط البلد ب 4 دينار تقريبا إذا كنتو اكثر من شخص تساعدكم ب تاكسي خير … و ممكن تروحو في حافلات السحاب . تشوفو أقرب موقف ليكم و إلا تروحو لمجمع المحطة (مكاش الحافلات تاع السحاب يوم الجمعة ) يعني أسهل طريقة هي الذهاب ب تاكسي … اذا قعد يستناكم مليحة (لأنو الزيارة ماتستحقش بزاف وقت ) و اذا راح … تهبطو تمشو شوية كي تلقاو الطريق الكبيرة ثما تجي حافلة السحاب ترجعو معاها ب أقل من دينار … تحطكم قريب ل وسط البلد
🔴 La carte SIM
شخصيا شرينا شريحة اسمها Umniah
فيها 30 gb انترنت و مكالمات غير محدودة في الأردن ب 17 JD . استعمالناها لمدة عشر ايام ل شخصين و بقاو فيها ممكن خمسطاش جيجا .. ممكن تلقاو عروض افضل في المطار .
🔴jordan pass
حنا كجزائريين و عرب غير معنيين بيه
لأنو الفيزا باطل و الدخول إلى المتاحف و المواقع الاثرية كيما كل العرب
المدرج الروماني ب 0.25 JD معاه متحف الاردن اللباس التقليدي ووو
جبل القلعة ب 0.25 JD
الجرش ب 0.5 JD
البتراء ب 1 دينار
متحف الفنون 1 دينار
متحف السيارات الملكي 5 دينار
مقام اها الكهف باطل
مبنى البريد باطل
متحف آرمات باطل
مسجد الملك عبدالله الثاني باطل للمسلمين
🔴 البحر الميت. الدخول إلى الشاطئ العمومي ب 20 دينار (هكذا قالولي) كاين فنادق عندهم شاطئ خاص .. تقدر تدخل ليهم بين 30و 40 دينار مع. الغداء بوفيه مفتوح و المسابح و الدوش و المناشف
و اذا تحب التوفير و المغامرات . كاين شاطئ تدخل باطل و تقدر تجيب الطين باسك كاين ب وفرة … بصح الدخلة تاعو صعيبة ( هبطة تاع جبل ) . و كي تكمل و تطلع الفوق … كاين شلال سخون ماء تاعو حلو …. يعني تقدر تشلل،روحك من الملح و في نفس الوقت الماء تاعو مليح و عندو فوائد … يعني تقدر تسقسي ناس ثما كيفاش الدخول ليه كاين حوانت على الطريق
🔴 الغوص في العقبةب 25 دينار مع الصور تحت البحر و يبعثوهم ف الواتساب
🔴وادي رم … اللي يحب يجرب الحياة البدوية كاين انسان ماشاء الله اسمو علي …يستقبلكم في دارو مبنية جديدة و نظيفة و مع العصر يديك في جولة ب jeep في وسط الكثبان الصور خرجو روعة مع العشا و فطور الصباح و اللي يحب مخيم . عمو عندو مخيم ممكن يعاونكم
🔴 البتراء اربع ساعات فيها يكفو .. الدخول ب دينار واحد .. كاين أطفال يطلعوك الفوق و يصوروك.. مع الأول يقولو ثلاث دينارات بصح اهدر معاهم شوية يطلعوك ب دينار واحد

هذا واش تفكرت ل حد الآن