#شحال_سقامتلي #الجزء_الثاني #الاسكندرية #مصر تكملة لرحلة الاولى والي جوزنا يا

#شحال_سقامتلي
#الجزء_الثاني #الاسكندرية #مصر 🇪🇬

تكملة لرحلة الاولى والي جوزنا يامات فالقاهرة الجميلة والثرية بالاثار و الطعام الذيذ قلت اواه يلزم نتحرك و صراحة كانت تالفتلي مابين الاسكندرية او بور سعيد وقنات السويس او الاصر مع اسوان
رحت حكمت طاكسي ب خمسة جنيه لمحطة القطار وًكان الاختيار الاسكندرية العزيزة 😍😌
شريت تذكرة كيما راني مصورهالكم فالمنشور ب خمسين جنيه او خمسة و خمسين جنيه. اعتقد ركبت جوايه الثامنة مساءا وصلت لتما جوايه منتصف اليل و نصف
قطار مريح فيه مرحاض كراسا واسعين و نتا كي تشري التيكي تريح فنفس رقم المقعد كاين وين تشارجي التيليفون بريزة كاين وين تشري الماكلة الداخل صراحة قطار قديم و لا يقارن بقطار الجزائر الحديث لكن كفى بالغرض
المهم كي ركبت اليتيليفون قريب يطفا كانت مريحة عاىلة قدامي بدينا نقصرو اغلب الضن مسيحيين هوما عادي لتما. خلوي
المهم كنت بدون حجز فندقي و ميزانية قليلة كيما تعرفو هههه و خايف منلقاش وين نبات لتم سييت نرقد فالقطار والو هههه
الفايدة والحاصولً وصلت للاراضي الاسكندرانية للمرة الاولى فاليل. ولتم دخل مابس كتبت hostel خرجولي و بديت نعيط بالواحد الي قريب و رخيس فيهم قاع الله يربح انا المهم نبات نشارجي ندوش و نوض نحوس نهمل فالنهار مايهمونيش الفنادق الفخمة هههه
سقسيت الشرطة وين نركب المكرو باص باش نروح لوسط المدينة وراولي ركبت
لقيت هوستل غرفة أوضة كيما يقولولها هومة منفردة ب سبعين جنيه فقطط. حوالي 700دج
رقت انتيك خلوي
✅اليوم الاول فالاسكندرية كنت شوية مهاوش لاني كنت بدون برنامج سفر حوست شوية لتم صرفت الاورو ببطاقة بايسيرا تاعي (بدون ضريبة وش درت وش جبت عكس الغردقة ضريبة 10%او اكثر ) فطرت تقليدي تاعهم و رحت لأكواريوم الاسكندرية سعر دخول رمزي ب 7جنيه. فيها كل الاسماك و الاحياء المائية
وبعض الجولات في الاسواق تاعهم.
فاليل رحت عند اشهر بائع اسماك في الاسكندرية وسمو شعبان للمئكولات البحرية كليت صحن كررفات ب 60جنيه حوالي 600دج
و كليت سمكة القاروس كيما نقولولها فالعاصمة. Loup de mère مشويين علا الجمر و يمدلك لاسالاد ولا سوبا باطل فقط ب 120جنيه
يعني كلش بالقازوز جاوني 185جنيه
مديتلو 200جنيه هبلوني شحال يطلبو تخلصو يزيد يقلك اكرمني. هههه
✅اليوم الثاني حكمت مكروباص و رحت لمكتبة الاسكندرية الغنية عن التعريف الدخول للعرب ب 70جنيه
فيها مكتبة كبييرة و متاحف و مخطوطات قديمة وتماثيل. شعراء و فنانين و مكتبة رقمية و جامعة كبيرة ومتحف الراحل انور السادات بكل البسته ومكاتبه وادواته
صراحة تجربة جميلة
تجولت شوية و تعشيت كبدة اسكندراني ب 4جنيه للسندويش كليت حوالي سبعة مي صغار يعني مش كبار لكن جد لذيذة مشهورة بيها الاسكندرية.
العصائر الطبيعية و سلطة الفواكه الي فالصور هاذي و السابقة تاع المنشورات ب 15جنيه فقط. كول يا قليل هههه
✅اليوم الثالث زرت قلعة قايتباي قلعة ضخمة وجميلة و جد نقية تحس روحك في لعبة prince of persia 1 الي لعبوها يفهموني سور عههه
الدخول ب 60 جنيه للعرب
الطلبة اليعندهم دليل بلي يقراو والصحفيين يخلصو نصف السعر
رحت درت تحفيفة اسكندرية و رحت نرقد. هههه
✅اليوم الرابع والاخير في المدينة الي شبهتها لوهران بزاف
شريت تذكرة قطار عودة للقاهرة ب 55جنيه
تعشيت مشاوي لتما شريت تذكرة حافلة GoBus ALMinyaافضل شركة حافلات في مصر باتجاه الغردقة ب 250جنيه والاحماس بدا يزيد 😍😍😍توحشت البحر والعومان ههه
شريت التبناج و ركبت فالحافلة التكملة في الجزء الثالث والاخير تاع الغردقة نخليكم تشوفو الصور 😍
ورابط الجزء الاول الي ماشافوش جزء القاهرة تلقاوه فالتعليقات 🙏🏻