شوية إيجابية .. أنا من عادتي نسافر وحدي و مين داك نروح لقارة وحدوخرا نقعد أقل من يومين و نعاود نولي … في الأردن راكب في طاكسي رايح من عمان للعقبة ، حبسونا في حاجز الشرطة ، كان سائق و إمرأة أردنية في القدام و في الوراء أنا و شخص مصري الجنسية .. الشرطي هذاك تكلم مع السائق و قالو فيه شخصين من جنسية جزائرية و مصرية .. جاء الشرطي قال شكون المصري فيكم !! نطق لي قاعد قدامي ، قالو أنزل من السيارة و راح معاهم باش يحوسوه و يحوسو الحقيبة ديالو و زاد حوسو المكان وين كان قاعد فيه !! أنا داخل السيارة ما خرجتش !! حتى جاء شرطي وحدوخر قالي نتا جزائري !! قتلو نعم جزائري قالي تفضل أنزل من السيارة ! أنا قلت دوك يبدا يسقي فيا و الباسبور ، بدأ يحكي معاي قالي الجزائر مرحبا بيكم يا بلاد الأمير عبدالله القادر و هواري بومدين و الشهداء و جميلة بوحيرد … و بدينا نحكيو في كلش قالي واحد الكلام نتوما الجزائريين ما نتلاقاوش بيكم كثير في الأردن بصح من جميع واحد نتلاقاو بيه ما شاء الله على التربية و الأخلاق ، شعب مثقف و شهم و لي تحس بلي ما راحش يخدعك .. المصري هذاك يحوسو فيه و الجزائري قاعد داير قهوة مع الشرطة الأردنية و يضحك ، الأردن بالاك البلد الوحيد لي الجزائري عندو قيمة كبيرة عندهم ❤️
