كاين حاجة لازم نفهمها فالدنيا هاذي، مهما قريت و تعبت و منعرف وين لحقت اتفكر بلي

كاين حاجة لازم نفهمها فالدنيا هاذي، مهما قريت و تعبت و منعرف وين لحقت اتفكر بلي الدولة ولا الخواص ما راحش يخلصوك على حساب قرايتك و الشهادة تاعك و مدى تفانيك فالخدمة، راح يخلصوك على حساب شحال صعيب باش يعوضك فالخدمة اذا رحت.
You are not paid according to how hard you work; you are paid according to how hard you are to be replaced.
وش معناها؟ معناها حتى و عندك ماستر، و تظن انو لازم يخدموك و يخلصوك مليح فقط خاطر عندك ماستر و تعبت فقرايتك، اتفكر بلي كاين أكثر من 5 ملايين جزائري عندهم ماستر و قادر تتعوض بسهولة، راح تخلص من هاذ المنطلق في أغلب الأحيان.
صحة حبيتو تفهمو أكثر؟ علابالكم بلي فالجزائر، استاذ تع ثانوي، ماستر فيزياء، يفهم فكل حاجة متعلقة بالفيزياء من الذرة للمجرات، يبدأ الخدمة بخلصة تع حوالي 45000 دج
في نفس الوقت، gouvernante générale تع service hébergements فلوتال، العالم و العلم تاعها ممكن ما يتعداش أسوار الفندق، راهي تخلص بين 15-20 مليون و أحيانا اكثر..
علاه في ميزكم؟ خاطر كاين بالقليل 50 الف واحد عندو ماستر في مجالات فيزياء، بصح كاين بالاك بالأكثر 100 تع les gouvernantes فالجزائر كامل.
و منه ما تربطوش القراية و الجهد بالرزق، لي قرأ خيرمن لي ما قراش، و لكن لازم تفهم بلي الدنيا عندها معايير مختلفة عن معايير المدرسة تاعك.
و ما تنساوش فالاخير، كنصيحة، اي حرفة تقدر تتعلمها و لا تتعلميها، ازدمو و ما تشاوروش، ما تعرفو وين راه مخليلكم ربي الرزق تاعكم.
تقدرو تبداو من ضرك، التسجيلات تع التكوين و التعليم المهنيين راهم مفتوحين، شوف الحرفة لي توالمك و اتكل على ربي ما خاسر والو، و اي استفسار بخصوص المهن الخاصة بالفندقة و السياحة و لا بالمعهد تع بومرداس تقدرو تسألوني و ان شاء الله ما نبخلكمش بحتى حاجة. و ربي يوفق كل واحد.