السلام علينا و عليكم
ملحوظة صغيرة: نبدا بدول اكثرية الشعب الجزائري يروحلهم بزاف و نتمنى تتعمم الفكرة
#ما_تغلطش_غلطتي #ماتغلطش_غلطتي و تلعبها شي ڨيفارا وسفير السلام 😂وتدخل للصحراء الغربية من المغرب كملت عليا 3 ايام قيد التحقيق في الحبس من أجهزة المخزن وترحيل من المغرب ومنعوني من الدخول مستقبلا 😂😂😂 و ما تاكلش البوزلوف في ساحة الفنا ب 300درهم 30€ لانو تشري بيهم صرعوفة تع بوزولوف😂 في الجزائر و جامي جامي تروح لهدوك لي يكتبوا القرآن في ساحة مسجد الفنا لانو راهو سحر وشرك بالله😥 و les jeunes لي تحوس تشري السلعة الحرة ثما مانقولكش وين تتباع😂 .
#ماتغلطش_غلطتي و دير ڨارو في البحر في اسطنبول لانو راح تخلص 100 ليرة غرامة 😂 و ماتلعبهاش خليفة المسلمين 😂 و تصلي في ايا صوفيا لانو يا محمد الفاتح راح تزيد تدي غرامة 120 ليرة 😂😂😂و اذا طالب اخدم بطاقة الطالب الدولية فيها réduction بزاف حتى ل 90٪ على تذاكر الاماكن السياحية و ماتروحش للترك في اوت لانو change تاعك راح تشريه ماء بارد just تشري القرعة تسخن في يدك وهذا هو السحر العجيب 😂😂 و ما تكريش اوتال في اكسراي لانو راح تشوف لعجب كي طيح الليل خاصة ادا كنت en famille 😂 و لجماعة السهرات حذاري يا اخااااااه تسهر في لي ديسكو تع شارع الاستقلال 😣😣 و ماتروحش لأنقرة لانو راح تضيع وقتك ودراهم ودراهم ودراهمك😂
#ماتغلطش_غلطتي و تدي معاك العولة بزاف للعمرة لانو والله ماراح تاكل 20٪ منها😂😂 و اشري وش راح تشري (خمارات ولا اقمصة و لا حوايج souvenir….) من المدينة و ما تخممش خلاص تشري من مكة لانو السعر تريبل، و ادا حبيت تعاود تحرم في مسجد عائشة روح في bus رخيس ب3 ريال و ما تحكمش طاكسي ب 35 ريال و ننصحك اعتمر في الليل لانو و الله مهابة اكثر وترتاح وتخشع اكثر من النهار، و روح لمكتبة الحرم كيما باب الملك فهد يعطوك مصاحف مجانية و اشري الخيمارات و السجادات تع الصلاة من الجزائر لانهم ارخص و تنقص الوزن تع الطيارة. و ما تلعبهاش صحابي جليل كيفي😂😂😂 خلصت قريب 90€ طاكسي باه نروح لحصون خيبر (موقعة غزوة فتح خيبر). و قبل ماتروح لمسجد قباء اتوضى في الفندق لانو حديث الرسول صلى الله عليه وسلم من توضأ في منزله و صلى ركعتين في قباء كانتا له أجر عمرة تامة. و لجماعة لي تتكيف الدخان ادي معاك ادي معاك ادي معاك 😂 لانو راح تكمل عليك يا تشري المالبورو ب 35 ريال و لا Bon ب 15 ريال من عند الهندي و يزيد يشنف عليك من الفوق😂😂😂 ويقولك ارجعلي بعد صلاة الصبح ما نبيعش ذرك😂😂. و ما تهدرش بالفرونسي لانو قلت لواحد الشيخ merci جابلي 3 كيلو كتب و مطويات تع الدين بالفرنسية😂😂 حسيت روحي راح نكفر لوكان نخليهم في لوتال مانديهمش معايا كابة 😂
#ماتغلطش_غلطتي كي تروح لجورجيا و تخلص تدخل للحمامات المعدنية التراثية لانو على قول المصاروة مالهاش الف لازمة😂
و ما تخممش تروح تزور ابخازيا (غرب جوريجا) لانها انفصالية و يصراولك مشاكل في الطريق و تولي تدفع 50€ للبوليسي باه ما يدرلكش غرامة ب 200€😂😂 و الخمر ثما اكثر من الماء يقدم مجانا في المطاعم لذا من الاول قولهم انا مسلم يتفهموك.
#ما_تغلطش_غلطتي و طلع معاك Power Bank +10k للطيارة لانو ممنوع
#ما_تغلطش_غلطتي و تأكل في اليشير 😂😂😂 ادي معاك من الدار ولا اصبر حتى تلحق😂
صرا فيك الباطل هههه
😂😂😂😂😂 معاناة لكن شكرا
هههه تاع الياشير نعطيك بطاقة استحسان 🦌 خليها عندك تسحقها و #ماتغلطش_غلطتي وتبحرها 😎
عجبتني تاع اليشير هههههههه
لمخيرة فيهم تاع اليشير 😂😂😂
تحس روحك تعشيت عند بوراك في مطعم المدينة
👏 hhhhhhhh
كي تروح تحرم من مسجد عائشة الطاكسي ب 20 ريال برك..
معاناها الواحد ب 5 ريال..وتكونو مع بعضاكم متفاهمين..خير من ال bus زوج سوايع وانت تستنا فيهم يكملو ..قيس مع يكملك العمرة تاعك ههه
ايه قلي على بطاقة الطالب هذي كيفاه ؟؟
Abdellah Ghanem hhhhhhhh
خخخخخ صباح الخير اخي
شكرا على المعلومات القيمة الاخ
Powerbank
ماشي ممنوع كاين انواع ممنوعة يعني حسب نوع الباتري ولا القوة
انا طلعت باوربانك مرتين ذهاب و اياب عادي جدا
اتفق معاك على انقرة . كرهت حيااااااتي
اكدلي على الياشير ليهود مايديروش واش يديرو هوما
بطاقة الطالب الدولية كيفاش نخدموها
Barah tala3t power bank m3aya f Tayara mahadrouch m3aya
يا خويا في العمرة ما تشري والو من ثم قميص تشريه منا بمتين الف ثم يقلك 120 ريال … انا شريت كلش منا اذا من سطيف كاين في بومرشي يبعو جملة و الله اسعار ملاح، و روح دير عمرتك خفيف و الكابة لي كنت رح تعمرها قش جيب فيها الماء
ربي يحفظك ….ماكليتيش في الياشير😂😂
شكرا
انا اسكن المدينة المنورة و كل ما قلته من نصائح للمعتمرين صحيحة…و فيه اخطاء اخرى سانشرها في وقت مناسب ان شاء الله….يعطيك الصحة
متغلطش و تدخل تولات تاع ستاسيون المخفي فالاخضرية راك تخلص 40 دج
Tal3t 20k powerbank nrml w dou5an jamais chft wa7ed daroulou procés f istanbul ghir ila lo7tou f trig balak , e cigarette ki ychoufk biha f plays public yglk 7abess w 5lass
ههههههههههه صاحا كراميشو راك ناشط زيد احكيلهم على الاوراس
بون ..روايال ..ڨولد لاف ..مالبورو الاسود
والله ياخاوتي أسوأ دخان تكيفتو في حياتي و صرفت عليه واحد 120 اورو معا العلم ما نتكيف بزاف .
لي يروح للخليج عامة ادي معاك دخان و تتهاونش .
لوكان استغليتها فرصة بش تحبس دخان اسهل💁
عجبني الوصف الذي يلي ما تغلطش غلطتي 😂😂😂😂😂
لي بغا يشري كادوات العمرة يشريهم من عين فكرون سعر جملة 😂🙄
بوزلوف مهوش ب 300 درهم في ساحة لفنا كليت ثما غير ب 15 ولا 20 درهم وكنت كاري في دار غير بحذا ساحة لفنا خيرمن لوتال معلباليش نت الا شريت بوزلوف كامل ولا شوية برك حق ما تتعشا
المهم راني معاك فتاع الياشير 100٪ هههه