10 طقوس و مخالفات وجب على “رواد الاماكن السياحة الطبيعية” عدم ممارستها حفاظا علي…

10 طقوس و مخالفات وجب على “رواد الاماكن السياحة الطبيعية” عدم ممارستها حفاظا عليها و على دوامها :

1- ما جيبش الدربوكة ✔️ الناس هاربة من الضجيج جاية تريح راسها و نتا جايبلهم الدربوكة (رايح تبان زاندياني)
2- ما تدخلش بالسيارة ✔️ حتى للبحيرة ،الشاطئ ، المساحات الخضراء رايح تفسد الشارم تع المكان … ماراحش تموت إذا ڨاريت و مشيت 100 متر … و ما تغلقش على الناس.
3- إرفد زبلك ✔️ كليت شربت ريحت جوزت جوغني إينوبليابل كي تكون رايح أرفد زبلك ما تكونكش جاهل .. مام المكان لقيتوا موسخ ..نقي واش قدرت … اذا ما قدرتش تنقي ما تزيدش عليه.
4- ما جيبش الدربوكة ✔️
5- ما تقطعش الاشجار ⁦✔️⁩ (الخضراء و الناذرة) خاصة كي تكون في مكان أسمو “محمية وطنية”
6- ما تشعلش النار وين جات ⁦✔️⁩ شعل وين شعلو الناس قبلك ماشي كل خمس ميترات فحم و جمر …ما تخليهاش شاعلة.
7- اللباس المحتشم ⁦✔️⁩ (رجال / نساء) … في العديد من القرى و المداشر و الاحياء السكنية …رايح تحرجهم باللباس الغير محتشم … خاصة البرامد لقصار …. الحرية ديالك تنتهي عند حرية الآخرين … ما فيها والوا تمونطي قميص و لا حاجة طويلة كي تخرج ملبحر …. راك عندهم لازم تحترم عقليتهم …السياح الاجانب عبر العالم و يستروا رواحتيهم إحتراما لعادات و تقاليد و ديانة سكان المنطقة لي رايحين يزوروها (القدوة ديالهم لازم نضربلهم مثال بيهم)
8- ماديرش موسيقى عالية ⁦✔️⁩ في السيارة أو مكبرات الصوت أو الهاتف … أسمع قيسك راك تجيني و تحرج فالناس .. كون أوموان موسيقى خفيفة هادئة تنسجم مع المكان … خالاص و العجال …
9- ما جيبش الدربوكة يرحم والديك ⁦✔️⁩
10- الكلام بصوت مرتفع ⁦و الهول✔️⁩ خاصة كي تكونوا مريحين قدام العائلات … صدقني ماراهمش حابين يسمعوا حكاياتكم و راهم شايدين كروشهم خايفين لا تزلقوا بكلمة … ديجا ما تسطاليش وين يكونوا العائلات ملخر.

الله يرضى عليكم تجنبوا قدر المستطاع هذه الطقوس … حفاظا على هذه الاماكن أولا … و باش ما تعطيوش أوكازيون لوحد الفئة لي راهم يحوسوا غير على السبة … و شكرا 🙏

(بارطاجي لعل و عسى)

4 Comments

  1. Mohamed Gb dňa مايو 20, 2022 o 6:34 م

    بارك الله فيك

  2. Khouloud Bl dňa مايو 20, 2022 o 6:41 م

    عشرة خطوط على اللباس والكلام الفاحش🤯🤯

  3. Morn Breeze dňa مايو 20, 2022 o 7:04 م

    بارك الله فيك خاصة رقم 10 ديروها قاعدة عامة (مش غير اماكن السياحة).. هذاك النهار قاعدين ملمومين فالدار فاتو برا سخطونا بالعياط تاعهم ملقيناش وين نحطو وجوهنا ربي يهدي ما خلق.

  4. Marwa Benadel dňa مايو 21, 2022 o 8:03 ص

    من الاخير. اذا متربي روح حوس و اذا ناقص تربية دارك تستر عارك 🤗

أترك تعليق