#1001_سياحة | جيجل
🔴 “حاب تجي لجيجل؟ .. واش لازمك تعرف”
شفت بزاف أسئلة توصل للصفحة يسقسو على الأسعار تاع الشقق و الشواطئ العائلية لي يقدرو يروحو ليها و الأماكن لي يحوسو فيها في جيجل، حبيت نفيدكم بهذا المنشور باش ما تقعدش هذه الأسئلة تتكرر.
◾أولا نحكو على كراء الشقق والمنازل
أنت بالعائلة و حاب تكري شقة و عندك سيارة 🚘 الحل أكري في إحدى البلديات المجاورة لمدينة جيجل و تكون بعيدة من 5 كلم الى 20 كلم باش يجيك السعر معقول خاطر كل ماتبعد عن المدينة يقل السعر.. مثل تاسوست، قاوس، الطاهير، الأمير عبدالقادر ،..وحتى ،تاكسنة ، جيملة. سيدي عبد العزيز، القنار ، أو أحياء بازول، لمزاير، المقاسب، الحدادة ،ليكيثى، لعقابي، مزغيطان، حراثن.. إلخ هنا السعر تلقاوه معقول لمنزل مجهز مثلا F1 بين 1500 دج و 2000 دج / F2 بـين 2500 دج و 3000 دج / F3 بـ3500 دج
ما تكريش الدار حتى تشوفها قبل، عجبتك أكري و لكان ما عجبتكش عادي جدا ما تحتمش علي روحك خطرش رايح ترتاح 🤷♂️ لي تكري عندو خلصو بعد ما تدخل علاش خطرش ليك الفايدة يعني تتهنا و ثانيا يقدر يزيدلك نهار و لا نص نهار لكان ما عندوش كراية داخلين.
في جيجل وسط البلاد تقدر تلقى ديار رخاس و بسومة معقولة وهذا الشي يفيدك بزاف 😍 حاب تستمتع و تفتح الباب تلقي البحر قدامك شوف المنازل لي جاية في الكورنيش (العوانة و زيامة منصورية) لكن السعر يكون شوية مرتفع 😢 وهذا أمر طبيعي.
◾ثانيا الفنادق والنزل
هناك الكثير من يفضل الحجز في الفنادق لما توفره من خدمات يتراوح سعرها من 5000 دج الى 6500 دج لشخصين وكلما يزيد عدد الأفراد يزيد السعر بحوالي 500 دج للفرد وانت وحسابك.. يوجد العديد من النزل الصغيرة والاقامات القريبة من الشواطى خاصة في اولاد بوالنار ولاكريك .. ومن ابرز الفنادق الجيدة في مدينة جيجل نجد فندق جزيرة و دار العز وتاغراست وهناك فندق شوبا بزيامة منصورية يحتوي على مسبح و شاطئ خاص وكذلك فندق المربع الذهبي بالميلية يحتوي كذلك على مسبح ويقدم خدمات جيدة
◾الشواطئ العائلية :
عندك سيارة > شاطئ آفتيس ، شاطئ بني بلعيد 💚شاطئ الكهوف العجيبة مع الواد تضرب عصفورين بحجر واحد، شاطئ العوانة ، شاطئ سيدي عبد العزيز و الجناح، الولجة و شاطئ التربة الحمراء هذا هليل بزاف 😍 كل هذه الشواطئ بعيدة شوية على جيجل مركز ↖️
ما عندكش سيارة > أنصحك بشواطئ تكون قريبة من المدينة تاع جيجل تروح صباح تبحر في النقل 🚌🏖️ و ترجع لعشية تسهر و تحوس في النقل تاني هذه الشواطئ هي
المنار الكبير، شاطئ أندرو، شاطئ الخليج الصغير، شاطئ بوسعدون، شواطئ كتامة و ال كلم 3 و شواطئ تاسوست ، أولاد بوالنار… 🏖️
الشواطئ لي تلقى فيها الغاشي بزاف : كتامة والمنار الكيير وسيدي عبد الغزيز لازمك تبكر ، و لي ما يعرفش يعوم مكالاه يروح للشواطئ الصخرية وهذا لسلامتكم 😊
◾لي يحب الغابات و الجبال 🏕️
كاين شلالات بزاف في جيجل مي صعاب باش توصل لهذا نروحو لحاجة ساهلة
شلال المشاكي ببلدية سلمى بن زيادة أكتب البلدية و رايح يخرجلك الشلال روح اتبرد ونقي بلاصتك
واد دار الواد زيامة منصورية منها تزور الكهوف و الكورنيش و الغابة و البحر يعني كلش ضربة وحدة
واد تازة في الصيف تلقاه ناشف مي مليحة تريح تتبرد تحت الشجر تاعو
واد أيدالن في الشحنة بارد بزاف و هايل و تشبع الكرطوس و الهندي، واد يرجانة بالعناصر.. الغابة عندك غابة غروش العوانة سلمى بن زيادة غابة بوعفرون بلدية جيملة ،غابة تامزقيدة غدير أم الحناش بلدية بودريعة بن ياجيس وغابة الزان أولاد عسكر وغابة الزان الشحنة وغيرها الكثير
◾بالنسبة للإطعام 🍢🍱🥘🍳
عينك ميزانك كاين بزاف مطاعم يخدمو حاجة شابة خاصة في المدخل الغربي تاع مدينة جيجل في ولاد بونار و المدخل الشرقي تاع مدينة جيجل سيدي عبد العزيز و بني بلعيد، ولمزاير كي تريح في الطاولة سقسي على الأسعار في الاول 💰 جاتك غالية ما تاكلش عادي، جابلك الاكل و ماعجبكش و توسوستلو رجعو عادي راك بدراهمك ماشي تاكل و بعدها كاش ما يصرالك تطفرها في روحك 🙃 وكاين تاني بيتزيريات في جيجل فتحو جداد يقدمون خدمات ماشاء الله
و الحل الافضل هو تقضي من المارشي و تطيب في الدار و الدراهم الزيادة كول بيهم المثلجات في الليل 🍧🍨 خطرش كل نهار تاكل برا تضر روحك 💰 تحب دير انهار الأخير كول برا قلش عائلتك 😁
احترم نظافة المكان دائما سواء الشاطئ أو الغابة وتجنب إشعال النيران أو الشواء في الغابة خاصة في الصيف احمل معك كيس وارمي فيه مخلفاتك وهزها معاك كترجع للمنزل ارميها في أقرب مكان لرمي للنفايات
إن شاء الله نكون قدرت نفيدكم و كاش إضافات في التعليقات.
#حوس_بلادك
#حوس جيجل
تبارك الله فيك نصايح في المستوى
الصراحة وجهتنا كل عام ❤️
ما حكيتلناش على غابه بارك وين جات
شكرا على كل المعلومات